Canolfan Iaith Caer Elen
Lleolir Canolfan Iaith Caer Elen ar gampws Ysgol Caer Elen yn Hwlffordd ac mae’n gwasanaethu disgyblion sydd wedi trosglwyddo i’r ysgol ac ysgolion cyfagos. Gyda sefydlu ysgol Gymraeg newydd 3-16 oed yn Hwlffordd ym mis Medi 2018, agorwyd Canolfan Iaith Caer Elen. Sefydlwyd Ysgol Caer Elen er mwyn ateb y galw cynyddol am addysg Gymraeg yn ne Sir Benfro. Mae’r Ganolfan Iaith wedi chwarae rhan allweddol yn nhwf a gweithgarwch yr ysgol o’r dechrau’n deg gan gynnig ymyrraeth ieithyddol i ddisgyblion wrth iddynt drosglwyddo o’r sector addysg Saesneg i addysg Gymraeg. Gwelwyd llwyddiant pellach yn nhwf addysg cyfrwng Cymraeg yn ne Sir Benfro gan agor Ysgol Bro Penfro ym Medi 2024. Mae Canolfan Iaith Caer Elen bellach yn gweithredu canolfan iaith lloeren yn Ysgol Bro Penfro er mwyn cefnogi disgyblion sydd wedi trosglwyddo i’r ysgol ac sy’n newydd i'r Gymraeg.
CANOLFAN IAITH CAER ELEN
Ysgol Caer Elen
Ffordd Llwynhelyg
Hwlffordd
Sir Benfro
SA62 4BN
Rhif ffôn: 01437 808470
E-bost: [email protected]/ [email protected]
Ysgolion sy’n mynychu Canolfan Iaith Caer Elen
- Ysgol Caer Elen
- Ysgol Bro Penfro
Cyrsiau Canolfan Iaith Caer Elen
Mae darpariaeth y Ganolfan Iaith yn cynnwys y cyrsiau canlynol:
Cwrs Hwyrddyfodiaid i blant cynradd
Ffocws y cwrs deuddydd hwn yn bennaf yw i gynnig ymyrraeth ddwys i’r disgyblion trwy ddulliau trochi iaith gyda’r elfen o hybu sgiliau llafaredd yn flaenoriaeth. Yn ystod y flwyddyn gyntaf hon caiff y disgyblion eu cyflwyno i eirfa a phatrymau sy’n allweddol i’w galluogi i gyfathrebu’n hyderus ar lafar ac i gael mynediad lawn at eu haddysg yn y ffrwd Gymraeg.
Cwrs Dilyniant i blant cynradd
Yn ystod ail flwyddyn y cwrs, ar y cwrs undydd yma, adeiladir ar y sylfaen o sgiliau mae’r disgyblion yn eu caffael yn y flwyddyn gyntaf gan dalu sylw cynyddol i hybu sgiliau llythrennedd ymhellach trwy ddarllen ehangach ac ysgrifennu estynedig.
Pontio
Yn ogystal â chyrsiau’r Hwyrddyfodiaid, mae’r ganolfan yn gweithio’n agos gyda’r ysgolion cynradd lleol a disgyblion Blwyddyn 6 a fydd yn parhau gyda'u haddysg yn Ysgol Caer Elen yng Nghyfnodau Allweddol 3 a 4.
Dathlu Diwrnod Shwmae
Ioga anifeiliaid
Dathlu Dydd Gwyl Dewi
Chwarae gemau iard yn y Gymraeg
Trip i ffatri siocled Wickedly Welsh
Gwaith atlas ar lefydd yng Nghymru
Creu nythod Pasg
Ymarfer adeiladu brawddegau
Cyn-ddisgyblion Canolfan Iaith Caer Elen
Dewch i gwrdd â rhai o gyn-ddisgyblion y ganolfan a chlywed am eu profiad.
Daisy
Yn fy marn i, mae’r Ganolfan Iaith yn wych oherwydd pan ddechreuais i ym mlwyddyn 5, nid oedd gen i lawer o Gymraeg o gwbl. Erbyn heddiw, gallaf gyfathrebu yn rhugl gyda’r athrawon a fy ffrindiau a dw i hefyd yn rhan o setiau uchaf y flwyddyn. Teimlaf yn hyderus i dreiglo a defnyddio idiomau yn fy ngwaith. Mae’r Ganolfan Iaith wedi galluogi mi i gwrdd â phlant o ysgolion gwahanol ac i ddatblygu fy sgiliau gwaith grŵp. Y peth gorau am y Ganolfan Iaith oedd y tripiau, fel y daith i’r Senedd; yr athrawon angerddol a’r gweithgareddau hwyl!
Finley
Dw i’n credu’n gryf iawn bod y Ganolfan Iaith yn lle wych i blentyn fel fi i ddatblygu. Plentyn a daeth i ysgol Gymraeg o ysgol Saesneg. Roedd yn siawns ffantastig i gael brofiad newydd ac i wella fy nghyfleoedd ar gyfer y dyfodol. Mae’r Ganolfan Iaith wedi helpu fi llawer yn fwy na beth oeddwn i wedi disgwyl. Roeddwn i wedi mynd o siarad un neu ddau frawddeg syml i gyfathrebu’n hyderus iawn mewn llai na ddwy flwyddyn! Fy hoff beth am y Ganolfan Iaith oedd yr athrawon gwych a’r teithiau amrywiol. Rhoiodd y daith i’r Senedd y cyfle i mi gyfweld a Eluned Morgan. Roedd yn brofiad ardderchog.
Robbie
Heb Mrs Rees, fy athrawes yn y Ganolfan Iaith, na fyddwn i fyth wedi cyrraedd y pwynt lle ydw i nawr. Roedd dysgu Cymraeg yn brofiad bythgofiadwy oherwydd ces i adeg mor hwyl yn dysgu iaith newydd. Cyn ddod i’r ysgol, doeddwn i ddim yn gallu siarad gair yn Gymraes a wnes i wir meddwl roedd e’n amhosib i ddysgu sut gymaint o eiriau newydd. Yn fy marn i, dydych chi ddim yn gallu dysgu rhywbeth newydd os nad ydych chi’n ei fwynhau. Erbyn heddiw, dw i’n set un yn Gymraeg ac yn gallu siarad yn rhugl gyda phawb yng Nghymru. Mae’r Ganolfan Iaith yn dangos eich bod chi’n gallu cysylltu dysgu iaith newydd gyda chael hwyl yn eich gwersi. Y peth gorau am y brofiad oedd mynd ar daith i Wickedly Welsh a dod nol i’r ysgol gyda pitsa siocled enfawr. Roeddwn i wir yn drist i adael y Ganolfan Iaith.
Dolenni defnyddiol
Gwefan Ysgol Caer Elen - Gwefan: https://ysgolcaerelen.cymru
Fideos: https://youtu.be/gsCyZaOtC_0 (Ein hysgol)
https://youtu.be/K_QETCH9I-U (Taith rhithiol - Cymraeg)
https://youtu.be/cWwYCQY_qYs (Taith rhithiol - Saesneg)